= Skipulags og umhverfisráð #110 = Fundur haldinn í Svörtuloftum, fundarsal í ráðhúsi Vesturbyggðar, 11. október 2023 og hófst hann kl. 16:00 ====== Nefndarmenn ====== - Svanhvít Sjöfn Skjaldardóttir (SSS) varamaður - Friðbjörg Matthíasdóttir (FM) aðalmaður - Jóhann Pétur Ágústsson (JPÁ) formaður - Ólafur Byron Kristjánsson (ÓBK) aðalmaður - Rebekka Hilmarsdóttir (RH) aðalmaður ====== Starfsmenn ====== - Elfar Steinn Karlsson (ESK) byggingafulltrúi - Óskar Örn Gunnarsson (ÓÖG) skipulagsfulltrúi ====== Fundargerð ritaði ====== - Elfar Steinn Karlsson byggingarfulltrúi == Almenn erindi == === 1. Erindi frá Páli Haukssyni varðandi umferðamerkiningar og bílastæði við Mýrar. === Erindi frá Páli Haukssyni, dags. 13. september 2023. Í erindinu er þess óskað í kjölfar gatnaframkvæmda og framkæmda við ofanflóðavarnir ofan Mýra að þá verði biðskylda við vestari enda götunnar afnumin. Þá er í erindinu lagt til að bannað verði að leggja ökutækjum ofan til við götuna, og ökutækjum verði lagt við gangstétt. Í dag er ökutækjum lagt beggja vegna götunnar sem skv. bréfritara þrengir akstursleiðina og þá myndi það létta á snjómokstri þegar þær aðstæður skapast ef bílar legðu eingöngu öðru megin götunnar. Skipulags- og umhverfisráð þakkar bréfritara fyrir góðar ábendingar og vísar málinu áfram til umhverfis- og framkvæmdasviðs sem nú vinnur að endurskoðun á umferðarreglum innan þéttbýlis í Vesturbyggð. Í þeirri vinnu verður hámarkshraði innanbæjar endurskoðaður ásamt því að farið verður yfir staðsetningu og gerð umferðarmerkinga. === 2. Þúfneyri. Umsókn um lóð undir spennistöð. === Erindi frá Orkubúi Vestfjarða ohf, dags. 22. september 2023. Í erindinu er óskað eftir lóð undir spennistöð við Þúfneyri í Patreksfirði. Spennistöðin er ætluð til landtengingar fóðurpramma fyrir laxeldi. Erindinu fylgir mæliblað frá Orkubúi Vestfjarða ohf. er sýnir ósk um staðsetningu. Skipulags- og umhverfisráð fagnar áformum um landtengingu fóðurpramma í Patreksfirði. Í ljósi þess að Þúfneyri er skilgreind sem útivistarsvæði í aðalskipulagi Vesturbyggðar leggur ráðið til að Orkubúi Vestfjarða ohf. verði úthlutuð lóð á hentugri stað utantil á eyrinni m.t.t. nýtingar á svæðinu. Sjá tillögu ráðsins í fylgiskjölum. Endanleg staðsetning og lagnaleið skal ákveðin í samráði við sveitarfélagið og þá skal halda raski í lágmarki og vanda frágang eins og kostur er. === 3. Deiliskipulagsbreyting - deiliskipulag hafnar- og þjónustusvæðis á Patreksfirði === Tekin fyrir tillaga að breytingu á deiliskipulagi hafnar- og þjónustusvæðis á Patreksfirði. Tillagan felur í sér skilgreiningu á fjórum íbúðarlóðum við Þórsgötu neðan við Mýrar á svæði sem skilgreint er sem ÍB1 í gildandi Aðalskipulagi Vesturbyggðar 2018-2035. Skipulags- og umhverfisráð leggur til að í skilmálum verði texta breytt á þá leið að einnig verði heimilt að byggja einbýlishús á lóðunum. Skipulags- og umhverfisráð leggur til við bæjarstjórn að tillagan fái málsmeðferð skv. 1. mgr. 43. gr. skipulagslaga nr. 123/2010. === 4. Vesturbotn - deiliskipulag === Tekið fyrir eftir auglýsingu deiliskipulag fyrir Vesturbotn. Tillagan var auglýst með athugasemdafresti til 21. september 2023. Engar athugasemdir bárust frá íbúum á auglýsingatíma en umsagnir bárust frá Heilbrigðiseftirliti Vestfjarða, Náttúrufræðistofnun Íslands, Umhverfisstofnun, Vegagerðinni, Minjastofnun Íslands og Skógræktinni. Fyrir liggja leiðrétt skipulagsgögn m.t.t. umsagna ásamt samantekt umsagna og viðbragða við þeim. Skipulags- og umhverfisráð leggur til við bæjarstjórn að tillagan fái málsmeðferð í samræmi við 1. mgr. 42. gr. skipulagslaga nr. 123/2010. **Fleira ekki gert. Fundi slitið kl. 17:25** Óskar Örn Gunnarsson var viðstaddur fundinn í gegnum fjarfundarbúnað.